Ministrat teknikë të Partisë Demokratike kanë përgatitur aktin formal të largimit nga Qeveria “Rama”, në të cilën u përfshinë si pjesë e marrëveshjes tre muaj më parë, për të monitoruar nga afër sjelljen e administratës në zgjedhje dhe për të garantuar pavarësinë e procesit zgjedhor.
Për Partinë Demoratike objektivat nuk janë arritur, sepse sipas kreut të saj Lulzim Basha, Edi Rama i kishte blerë zgjedhjet përpara arritjes së marrëveshjes. Pavarësisht kësaj ministrat teknikë qëndruan në detyrë edhe gati dy muaj pas zgjedhjeve për të hartuar raportin për standardin e zgjedhjeve.
Raporti ka përfunduar dhe menjëherë pas tij, ministrat kanë dorëzuar zyrtarisht dorëheqjet. Zëvendëskryeministrja dhe ministrat teknikë nuk janë takuar asnjëherë këto 3 muaj me kreun e qeverisë ku bënin pjesë. Komunikimi është realizuar përmes Sekretarit të Përgjithshëm të Kryeministrisë.
Përpara se të jepnin dorëheqjen, disa prej ministrave teknikë i kishin kaluar më parë kompetencat te zëvendësministrat përkatës: ministri i Brendshëm, i Shëndetësisë dhe ajo e Financave, transmeton TCh.
Duket se me përfundimin e raportit për zgjedhjet dhe dorëheqjen e vetë ministrave, bie çdo tezë për një bashkëqeverisje Rama-Basha, gjë për të cilën kryetari Basha është sulmuar ashpër nga kritikët brenda Partisë Demokratike.
