Kam 35 vite nën tokë dhe nuk kam asnjë luks që kanë të gjithë minatorët në botë, kështu shprehet një minator i cili punon në minierën e Bulqizës.
“Kushtet janë të mjerueshme. Kemi një pension qesharak. Unë i kërkoj shtetit që të paktën të bëhet 400.000 mijë lekë”, shprehet ai për “Njerëz në fokus” në “News24”.
Ndërsa Diraveri, i cili është kryetari i social punëtorëve, u shpreh se “puna e minatorit është e vështirë”. Madje shprehet se në vitin 2018 nëse nuk miratohet statusi i minatorit do të ketë protesta.
“Është një punë e vështirë dhe kërkoj me këmbëngulje miratimin e statusit të minatorit. Nuk e kërkojmë tani, por në vitin 2018. Nëse nuk jepet statusi i minatorit atëherë do të zhvillojmë protesta. Ne marrim një pension që është turp të thuhet, 250.000 mijë”, shtoi ai.
Statusi i minatorit është kërkuar prej vitesh, por deri tani është harruar nga të gjitha qeveritë që kanë ardhur në pushtet. Ndërkohë një tjetër person ka humbur jetën këtë të mërkurë në minierën e Bulqizës. Situata sa i takon sigurisë së jetës së punonjësve të nëntokës paraqitet ende problematike.
