Gjatë paradites së sotme, një grup minatorësh në pension kanë dalë në protestë para Kryeministrisë, për të kërkuar statusin.
Pavarësisht se kjo protestë ishte e ndaluar nga Policia e Tiranës, ata kanë vijuar me aksionin e tyre. Në një zë ata kërkojnë të drejtën për statusin e minatorit, ndërsa shtojnë se etapat e diskutimeve me qeverinë kanë kaluar.
“Jemi brenda rregullave, është protestë paqësore, jo për të shkatërruar e djegur. Kërkojmë të drejtat tona. Minatorët kërkojnë statusin e tyre.
Ne do ta vazhdojmë protestën. Kërkojmë një të drejtë që duhet të ishte dhënë që në fillim të demokracisë.
Ne kemi bërë bisedime me ministrinë përkatëse, dhe ka qenë zv.ministri në tavolinë dhe kemi rënë dakord për 11 pikat e statusit. Si status ka përfunduar, ka kaluar të gjithë institucionet, por nuk e kuptojmë pse vjen ky ngërç.
Ndaj ne do dalim në protestë para Kryeministrisë, që ky status të jepet në kohën sa më të shkurtër. Ne jemi të organizuar në mënyrën më të mirë të mundshme”, deklaroi Taf Koleci.
