Trajneri i Kukësit, Mllade Milinkoviç, është shprehur i kënaqur për fitoren që arriti ekipi i tij ditën e sotme përballë Luftëtarit. Por kërkoi nga lojtarët që të mos kënaqen me pak dhe të largojnë egoizmin kur krijohet një rast për të shënuar. Nuk është kursyer edhe ndaj drejtuesve të Luftëtarit, me të cilët ka bashkëpunuar një vit më parë por është akoma në gjyq pasi nuk ka marrë pagesën e tre muajve të fundit.
“Për sa i përket rezultatit, nuk është ai që duhej të ishte, sepse Luftëtari na vendosi në vështirësi të mëdha sidomos në 15-20 minutat e para të pjesës së dytë. Luftëtari tregoi se ka ekip të mirë dhe nuk e meriton vendin në renditje. Ne kemi luajtur mjaft mirë dhe nëse luajmë kështu, nuk kemi frikë askënd. Goli i tretë ishte shumë i bukur, por nuk jam i kënaqur me lojtarët e mi, sepse tregohen shumë egoistë dhe kënaqen me pak, jo vetëm sot. Duhet të kërkojmë të shënojmë më tepër, në çdo ndeshje.
“Goli i parë? Gjithçka ndodhi shumë shpejt, dikush i ra bilbilit nga jashtë dhe lojtarët vendas u ndalën, ndërsa Bakaj u tregua i shpejtë dhe shënoi. Nuk di ç’të them, shoh Gurin që pason topin dhe ne vazhdojmë lojën.
“Gjyqi? Nuk jam paguar prej prillit deri në qershor, nuk kam marrë as premiot e bonuset, ndaj e kam çuar çështjen në FIFA. Kemi kërkuar të drejtën tonë, sepse presidenti i Luftëtarit nuk na është përgjigjur. Të gjitha dokumentet janë edhe në FSHF”.
