Pas hapit fars që bëri një ditë më parë Skënderbeu, dukej se sfida e sotme me Kukësit dhe Partizanit në “Zeqir Ymeri”, do tu shërbente verilindorëve për t’iu afruar më shumë kryesuesve. Por nuk ndodhi kështu pasi ata u mposhtën në shtëpi nga “të kuqtë” dhe kjo nuk do të kapërdihet lehtë nga presidenti Gjici. Probleme të shumta janë parë në repartin mbrojtës tek Kukësi i Milinkovic, i cili duket se i ka ditët e numëruara.
“Fatkeqësisht themi javë pas jave se mund t’i afrohemi Skënderbeut në renditje por ne në vend që të afrohemi po distancohemi më tepër. E filluam mirë ndeshjen, kaluam në avantazh por u penalizuam nga dy gabime të cilat janë gabime që nuk mund të bëhen. Edhe në pjesën e dytë e filluam mirë, në minutat e para kishim dy raste të pastra me Shtubinën dhe Aliyev, goditëm shtyllën gjithashtu me Gurin, por ky është futbolli”, shprehet tekniku serb.
Dita e nesërme do të jetë vendimtare për kreun e pankinës së Kukësit, i cili mesa duket nuk është i kënaqur nga paraqitja që ka bërë ekipi dhe është i gatshëm të diskutojë dorëheqjen nga ekipi.
“Nesër do kem një takim me presidentin, do diskutojmë do flasim dhe do marrim një vendim. Më vjen keq sepse përgjegjës për këto rezultate të dobëta jam unë. Ashtu si presidenti edhe ne si ekip si lojtarë si staf bashkë me tifozët prisnim që të ngushtonim diferencën me Skënderbeun, por gabuam. Do marrim një vendim në të mirën e skuadrës, pasi i rëndësishëm është Kukësi si ekip”.
Kemi gabuar shumë he janë gabime amatore që nuk e mendoja që mund të ndodhnin. Por nuk kam asnjë dyshim për atë që japin lojtarët në fushë, sepse ata nuk bëjnë asgjë për mua,por për ekipin e Kukësit.
“Unë besoj që lojtarët luajnë për ekipin, nuk kanë pse të luajnë për mua apo për ndonjë person tjetër. Megjithatë gabimet janë të shumta dhe kjo duhet pranuar”, përfundon Milinkoviç.
