UEFA pak ditë më parë doli në përfundimin që Milani nuk i plotësonte kushtet e Fair Play Financiar, duke iu bazuar relacionit të dërguar nga kuqezinjtë në dhjetor. Si pasojë ata mund ti bllokojnë Milanit merkaton dhe në rastin më të keq ta përjashtojnë nga Europa League.
Menjëherë pas mbledhjes së bordit drejtues të Milanit, administratori Marco Fassone provoi të qetësonte tifozët dhe garantoi se projekti i klubit do të vazhdojë pavarësisht masave që priten nga UEFA. Drejtuesi kuqezi premtoi se përforcimet e pritura në merkato nuk do të mungojnë. Madje, ai theksoi se pronarët e klubit do të rrisin kapitalin, jo me 20 por me 40 milionë euro.
“Pavarësisht shqetësimit për përjashtimin nga Europa League, skuadra do të përforcohet me blerje të reja. Do të vijnë 2 ose 3 lojtarë. Çështjen e çmimit dhe shpenzimeve në merkato do ti vlerësojmë më vonë, por ky problem nuk do të ndikojë”, deklaroi Fassone .
Sipas tij, nëse frika e përjashtimit nga Kupat e Europës do të realizohet, klubi po studion mënyrën si mund të ndryshojë strategjitë ekonomike në merkato, por tifozët nuk duhet të shqetësohen për asgjë. Drejtuesit e Milanit kanë përgatitur edhe argumente të rinj për të futur bilancet në parametrat e fair play-t financiar të kërkuar nga UEFA dhe klubi do të punojë për të treguar garancitë dhe siguritë ekonomike për të ardhmen.
