Milani ka bërë një goditje të madhe në merkato, pasi arriti të finalizonte me sukses transferimin e brazilianit të Flamengos, Lucas Paqueta. Kuqezinjtë besohet se kanë paguar 35 mln euro për 21-vjeçarin, duke lënë klubin brazilian me shumë para për të shpenzuar.
Nga kjo situatë mund të dalë i fituar edhe Interi, i cili mund të largoj një blerje të ‘dështuar’. Bëhet fjalë për Gabriel Barbosa (Gabigol), i cili ishte edhe golashënuesi më i mirë i Santos këtë sezon në Brazil, por që klubi nuk ka para mjaftueshëm që ta blejë. Flamengo është përfolur për një transferim të lojtarit, dhe Gazzetta dello Sport raporton se është gati të paguajë 22 mln euro.
Zikaltrit do të ishin gati ta pranonin ofertën, teksa duan të kompensojnë sa më shumë nga 33.5 mln eurot e paguara për të në vitin 2016. Braziliani nuk e nisi asnjë ndeshje të Serie A si titullar dhe shënoi vetëm një gol për Inter.
