Milan-Inter/Spalletti për të rikthyer besimin, Gattuso për të shpëtuar “kokën”

Çerekfinalja e Kupës së Italisë do të na sjellë një përballje të jashtëzakonshme, bëhet fjalë për derbin e Milanos. Edhe pse ky i fundit e ka humbur shkëlqimin në vitet e fundit dhe nuk ka interesin që ka pasur vite më parë, sërish mbetet special dhe me një rivalitet të madh. Këtë herë të dy ekipet janë në fije të perit, por që mund të rëndojë më shumë për Milanin i cili ka zhvilluar një sezon katastrofë këtë pjesë të sezonit. Interi nga ana tjetër edhe pse mbetet kampion në derbi, pasi në 15 shtatorë arriti të fitonte falë tregolëshit të Icardit, forma aktuale që po kalon ekipi nuk është më e mira. Pasi në javët e fundit ka shijuar dy humbje të njëpasnjëshme, me Udinesen dhe Sassuolon, por nuk duhet harruar ai barazim me Perdonones në “San Siro”, që solli këtë ecuri negative më pas.

Milani që nga humbja në derbi më 15 shtator nuk ka arritur më të ngrejë kokë, as shkarkimi i Montellas dhe emërimi i Rino Gattusos nuk ka sjellë ndryshim. Për këtë arsye mund të themi që kjo do të jetë një sfidë edhe për Gattuson i cili mund edhe të bëjë gati valixhet në rast se s’kualifikohet nga Kupa. Ndërsa tek Interi kriza e ndeshjeve të fundit ka sjellë një shqetësim të madh në pankinë, por nuk mund të themi që Spalletti rrezikon nëse nuk arrin të fitojë derbin. Problem për Interin do të jetë mungesa e dy lojtarëve ku në mbrojtje për shkak dëmtimi, Dambrosio dhe Miranda.

Për këtë arsye të dy trajnerët do të kujdesen në maksimum për të përzgjedhur formacionin startues të kësaj sfide. Tek Interi i Spallettit pritet të ketë shumë pak ndryshime nga 11-tëshja që jemi të mësuar javë pas javë, ose mund të themi që të vetmit lojtarë që do të zëvendësohen do të jenë ata që mungojnë për shkak dëmtimi. Gattusso pritet të ndryshojë taktikë dhe të ndryshoj komplet skemën e tij nga me tre mbrojtës me katër. Motivimi për derbi është gjithmonë i madh, por kur në stol është një njeri gjaknxehtë si Gattuso, pritet që kjo ndeshje të dhurojë vetëm spektakël.