Presidenti Meta, gjatë mesditës së sotme ka folur për mediat në lidhje me takimin që pati me kryeministrin Rama, një ditë më parë.
Meta tha se dy ishin çështjet kryesore për të cilat biseduan, ajo e hapjes së negociatave, si dhe çështjet e mbetura pezull me Greqinë.
Ai e ka cilësuar si një takim normal mes presidentit dhe kryeministrit të vendit, e ku pas nuk ka lënë edhe rëndësinë e Vettingut për anëtarët e Kushtetueses. Presidenti apeloi për një gjykatë funksionale, për ti dalë zot Kushtetutës së vendit.
“Takimi i djeshëm me Ramën ka qenë normal, janë diskutuar disa çështje, kryesisht lidhur me rëndësinë e çeljes së negociatave, ku shpresojmë në një vendim pozitiv.
Natyrisht edhe për ecurinë e negociatave me Greqinë, kemi diskutuar, por jemi në një proces për të marrë vendime të mëtjeshme, pasi Presidenca pret informacione edhe më të plota, sipas standardeve më serioze, që meriton kjo çështje.
Shpreh kënaqësinë për konfirmimin e zotit Dedja te Gjykata Kushtetuese, është i merituar. Dua të nënvizoj rëndësinë e Vetting-ut për anëtarët e Kushtetueses. Është e domosdoshme të kemi sa më shpejt një gjykatë funksionale, për t’i dalë për zot Kushtetutës së vendit”, tha Meta.
