Presidenti i Republikës Ilir Meta tha sonte se është plotësisht i bindur se ka marrë një vendim të drejtë duke i dhënë shtetësinë Anastas Janullatos. Në një intervistë për emisionin “Opinion” të Blendi Fevziut, Meta deklaroi se Janullatos i plotëson të gjitha kriteret. Meta shprehu konsideratat më të larta kur tha se Janullatos ringriti nga hiri Kishën Autoqefale të Shqipërisë duke e bërë atë sot në një nga kishat më të nderuara në botë.
“Kam qenë shumë i bindur dhe sot jam shumë i bindur, në të shkuarën do të jem edhe më i bindur. Sepse mua me vjen keq, pasi ne ende vazhdojmë të politizojmë çështjen e besimit. Jam shumë i bindur për drejtësinë e vendimit për Janullatosin sepse jo vetëm Fortlumturia e Tij i plotëson të gjitha kriteret por sepse ai ringriti nga hiri Kishën Autoqefale të Shqipërisë duke e bërë atë sot në një nga kishat më të nderuara në botë”. Kështu është shprehur Presidenti i Republikës Ilir Meta sonte në emisionin” deklaroi Meta.
Ai tha se vendimi për t’i dhënë nënshtetësinë shqiptare Kryepeshkopit Anastas Janullatos ishte një detyrim së pari ndaj besimtarëve ortodoksë shqiptarë:
“Ka qenë jo vetëm një detyrim ndaj të gjithë besimtarëve ortodoksë shqiptarë por ka qenë një kërkesë e vazhdueshme e shumë personaliteteve të shquara të vendit tonë, doktorë, rektorë, ish-dekanë, emra nga më të shquarit të mjekësisë, të shkencës. Por për popullin grek Janullatos nuk është thjesht një klerik i lartë por një idhull i adhuruar për shkak të personalitetit të tij të jashtëzakonshëm, si mendimtar në fushën e besimit dhe të teologjisë, si idealist dhe humanist dhe personalitet me reputacion të jashtëzakonshëm ndërkombëtar”, theksoi Meta.
Ai solli një ilustrim të këtyre deklaratave. “Edhe Mikis Teodorakis, kompozitori i madh grek që po bën 100 vjeç, në letrën publikë drejtuar Janullatosit i shkruante ‘Anastasi i zemrave tona’”, tha Presidenti i vendit.
Meta ka rrëfyer edhe diçka të pathënë ndoshta më parë në lidhje me qëndrimin e tij ndaj Janullatosit dhe ndryshimin e mendimit ndaj tij në vitin 2000 në Boston.
“Edhe unë deri në vitin 2000 kam pasur paragjykimet e mia për Janullatosin, por gjatë vizitës në Boston tek Kisha ortodokse shqiptare, ku takova At Artur Liolin, pata një bisedë vetëm për vetëm me të vetëm për çështjen e Janullatosit.
Ai më dha një ide shumë të mirë: ‘Mos e gjykoni nga kombësia, por shikojeni si një personalitet të besimit’. Disa vite më vonë, publikisht At Artur Liolin do të deklaronte se edhe Imzot Noli, po të ishte gjallë do ta priste dhe do ta respektonte Fortlumturinë e Tij”, tha Meta.
Ai tha më tej se ata që ende paragjykojnë Janullatosin i kujtojnë gjyshen dhe djalin e tij 6 vjeç.
“Kur isha i vogël gjyshja ime në fshat, kur bënim zhurmë na trembte duke na thënë: ‘Erdhi greku, erdhi greku!’, sepse në ato zona historikisht kishte pasur luftëra me grekët, ashtu si në Kolonjë, Korçë apo Panarit. Ndërsa më kujtohet kur para dhjetë vitesh, duke parë një film në Explorer për komunizmin, u bëra kurioz të pyesja djalin i cili ishte vetëm 6 vjeç dhe po luante me lodra se ç’mendim kishte ai për komunizmin. Ai pa u menduar fare mu përgjigj, ‘komunizmi varte priftërinjtë o ba’, dhe vazhdoi lojën. Këto fjalë të tij më kanë mbetur në mendje se çfarë kishte kuptuar ai nga komunizmi”, tha Meta
