Nga Ferdinand Dervishi/Pas telenovelës me dekretimin e ministrit të Brendshëm Lleshaj, në horizont duket se do të nisin xhirimet për një tjetër film.
Presidenti Meta, pasi ka firmosur shkarkimet e ministrave të larguar nga Rama, ka ngurruar për një emër: ministrin e Jashtëm, Ditmir Bushati.
Po si ta lexojmë këtë lëvizje të fundit të Presidentit?
A ka lidhje ky qëndrim me çështje parimore që krijojnë mosbindjen e presidentit për të dekretuar ministrin e ri të Jashtëm, Gent Cakaj? Me dyshimet se ai nuk plotëson kushtet, nuk ka staturën, formimin, eksperiencën e të tjera për të qenë ministri i Jashtëm i Republikës së Shqipërisë, siç po flitet nga disa politikanë e përflitet edhe në disa media?
A ka lidhje ky hezitim me faktin se një personazh i tillë mund të hapë probleme për shkak të detyrës, mund të shkaktojë skandale diplomatike ndërkombëtare, mund të paraqesë papjekuri ridikuluese, apo më keq akoma mund të shkaktojë incidente që mund të rrezikojnë marrëdhënie historike mes Shqipërisë e shteteve të ndryshme etj?
Të paktën në sipërfaqe kjo është duke u parë apo lexuar.
Por ka edhe një tjetër shpjegim. Nuk është aspak çudi që Meta, edhe në këtë rast, më shumë se me Gent Cakajn, ta ketë problemin me kryeministrin Rama.
Janë probleme që kohët e fundit po shtohen dita-ditës. Probleme që kanë nisur qysh pas largimit të LSI nga tepsia e pushtetit, që pas shënjestrimit për korrupsion nga prokuroria apo edhe policia të drejtorëve apo zyrtarëve të ndryshëm të emëruar nga LSI,- kjo pas një fushate baltosjeje, qysh pas zvogëlimit të anëtarësisë së LSI për shkak të përthithjes nga PS, qysh pas përfoljes edhe për arrestime apo linçime të nivelit më të lartë – sidomos pas valëvitjes kërcënuese të reformës në drejtësi.
Pra përballë kësaj situate, nuk është aspak çudi që Meta të bëjë sa ka në fuqitë e tij kundër kryeministrit. Aktualisht Meta, si President i Shqipërisë, ka në duar të dekretojë, të zvarrisë apo të mos dekretojë fare vendime të Kryeministrit Rama. Dhe këtë ai është duke e bërë sa herë që i jepet, jo vetëm rasti, por edhe një pjesë e tij.
Kështu ai nuk dekretoi për gati një vit kreun e shërbimit sekret, bëri shumë rezistencë dhe mori shumë energji e vëmendje për ministrin e Brendshëm Lleshaj dhe duket këtë kërkon të bëjë edhe aktualisht me emërimet e reja të ministrave nga Rama. Madje këtë radhë në fushë ka më shumë mundësi për të nxjerrë kleçka, pasi bëhet fjalë për 9 shkarkime dhe po aq emërime.
Pra më shumë se i lidhur me çështje parimore, vendimi i fundit i Metes për t’u menduar për dekretimin e shkarkimit të Bushatit apo për të reflektuar për dekretimin e ministrit të ri Caka, ka lidhje me çështje më tokësore apo më banale. TIRANA TODAY
