Kryetari i Kuvendit në detyrë, njëherësh President i zgjedhur në Kuvend, Ilir Meta gjatë një aktiviteti në ditën ndërkombëtare të jetimëve, u bëri thirrje autoriteteve qendrore e lokale të përmirësojnë politikat e trajtimit të kësaj kategorie të shoqërisë.
Në fjalën e tij Meta vlerësoi se për të arritur këtë, më i nevojshëm se sa paratë, është vullneti. Sipas tij qeveritë lokale duhet të trajtojnë me prioritet politikat e strehimit të jetimëve, por edhe cdo strukture tjetër duhet të mbajë përgjegjësinë që i takon për integrimin e jetimëve si të barabartë në shoqëri.
Ai shtoi se përmirësimi i jetesës së jetimëve duhet të kalojë nëpërmjet një zinxhiri të tërë hallkash, si strehimi, kujdesi shëndetësor, arsimimi, kualifikimi e punësimi.
Meta premtoi se edhe në krye të institucionit të Presidentit, do të vijojë bashkëpunimin me Shoqatën Kombëtare të Jetimëve për të dhënë kontributin e tij.
