Presidenti Ilir Meta ka shkarkuar Ditmir Bushatin, dhe ka dekretuar kryeministrin Edi Rama në postin e ministrit për Europën dhe Punët Jashtme. Dekreti është firmosur sot, një ditë pasi u bë betimi në Presidencë i ministrave të rinj.
Ndërkohë Meta refuzoi dekretimin e emrit të Gent Cakajt në postin e ministrit të Jashtëm, dhe pas këtij veprimi Rama dërgoi emrin e tij për postin e ministrit të Jashtëm, duke e paralajmëruar se do shiheshin në Gjykatën e re Kushtetuese.
Në njoftimin për media, citohet se emërimi i kryeministrit edhe në detyrën e ministrit është një rast i veçantë, që nuk parashikohet dhe as ndalohet nga Kushtetuta e Republikës së Shqipërisë.
Po kështu, në shqyrtimin e këtij propozimi, Presidenti i Republikës, në cilësinë e Kreut të Shtetit, ka mbajtur në konsideratë edhe rëndësinë e evitimit të çdo mundësie për krijimin e një krize institucionale, e cila do të dëmtonte pozitën e Republikës së Shqipërisë në marrëdhëniet ndërkombëtare.
