Një foto mjaftoi që gjithçka të thyhej mes Mesut Ozil dhe Gjermanisë. Çuditërisht në një kohë të shkurtër u kthye në foton më të komentuar në botë, për faktin se krah ti ishte presidenti i Turqisë, Recep Tayyip Erdogan. Në Gjermani u krijua një situatë kaotike, ku politikanë dhe drejtues të lartë nuk nguruan të shfryjnë ndaj futbollistit të kombëtares së tyre, që për disa vite rresht kishte qenë më i miri në fushë.
Debati kaloi cakun dhe Ozil u largua nga kombëtarja gjermane, por jo pa bërë bujë dhe ky vendim. Ai ngriti akuza të forta të racizmit në rankun e lartë të drejtuesve të Federatës Gjermane të Futbollit.
Por së fundmi është “Daily Mail” që ka publikuar një lajm ku thekson se mesfushori turko-gjerman nuk është pranuar të vizitojë shkollën ku është arsimuar dhe ka investuar 55 mijë euro.
Vetë drejtuesit e shkollën ia kanë anuluar ftesën lojtarit të Arsenal pasi kanë frikë se mund të ketë pasoja politike që mund të ndizen nga e djathta ekstreme gjermane.
Mesut Ozil që nga koha që është transferuar tek Arsenal, u kishte mundësuar disa udhëtime nxënësve të shkollës në vende të ndryshme në Angli, por edhe në vende të tjera.
