Nis përzgjedhja e teksteve mësimore që do të përdorin nxënësit e arsimit parauniversitar përgjatë vitit të ri shkollor 2017-2018. Me anë të një urdhri të dërguar në institucionet shkollore, MAS ka detajuar rregullat që do të zbatohen në fazat e përzgjedhjes së teksteve me të cilat do të punojnë nxënësit, si dhe afatet që duhet të respektojnë shtëpitë botuese për shpërndarjen e tyre.
Mësuesit të cilët janë pjesë e komisioneve lëndore në çdo shkollë, kanë nisur punën për shqyrtimin e teksteve që MAS ka miratuar për katalogun e vitit të ri shkollor. Ata do të veçojnë edhe tekstin më të përshtatshëm për të punuar me nxënësit e tyre përgjatë vitit të ri mësimor.
Në rast se mësuesit e klasave, ose të komisioneve lëndore nuk bien dakord për të njëjtin tekst, përzgjedhja do të bëhet me votim, ku fitues do të jetë teksti shkollor që do të marrë më shumë vota, ndërsa pjesë e mbikëqyrjes së procesit të përzgjedhjes së teksteve do të jenë edhe prindërit.
Mësohet se mësuesit e çdo shkolle kanë afat deri në datën 2 qershor për të detajuar listën zyrtare të teksteve me të cilat duan të punojnë.
Për të shmangur përzgjedhjet klienteliste, apo abuzive, MAS ka konfirmuar marrjen e masave penalizuese në rast së mësuesit do të favorizojnë shtëpitë botuese në përzgjedhjen e teksteve.
Sipas urdhrit të MAS, nuk mund të përzgjidhen tekstet që kanë autorë, redaktorë, korrektorë, apo ilustrues, të cilët janë mësues të shkollës përkatëse. E në raste se kjo gjë ndodh, mësuesi do të penalizohet me largim nga puna.
Gjithashtu, mësohet se shitja e teksteve në shkolla do të nisë më 25 gusht dhe do të zgjasë deri në 10 shtator.
Tekstet do të shiten pranë pikave të posaçme që shkolla i ka lënë në dispozicion shtëpive botuese që kanë siguruar tekstet, shkruan Dita. Këto tekste duhet të kenë detyrimisht pullën dhe hologramin e MAS.
