Të shumtë janë djemtë dhe vajzat që mbarojnë studimet e tyre për mësuesi, por shumë pak prej tyre punojnë në profesion. Por tashëm me vendim qeverie të gjithë ata që duan të punojnë si mësues duhet të japin provimin për të marrë licencën për të ushtruar këtë profesion fisnik. Këtë të hënë nisin provimet e shtetit për mësuesit e rinj që duhet të licencohen, që të mund të ushtrojnë profesionin. Agjencia Kombëtare e Provimeve ka bërë publike datat e testimeve për 24 profile mësuesie. Ato nisin më 10 korrik me arsimin fillor dhe përfundojnë më datën 7 gusht me mësuesit e gjuhës italiane dhe ato të artit figurativ.
Një ditë më parë, në faqen zyrtare janë pasqyruar edhe emrat e rreth 2800 mësuesve që do të futen në provim e përbri tyre orën dhe datën e testimit. Në ditën e provimit, AKP-ja apelon mësuesit e rinj që në ditën e provimit të kenë dokumentet e duhura, të cilave iu është shtuar edhe ai për njohjen e gjuhës së huaj.
“Kandidatët për provimin e rregulluar të mësuesit duhet të kenë parasysh që ditën e provimit të kenë me vete kopje të diplomave të programeve të Ciklit të Parë dhe të dytë të studimeve të përfunduara prej tyre, si dhe njohjen e tyre nga MASi, në rast përfundimi të programeve të studimit jashtë shtetit.
Kandidatët, të cilët nuk janë pajisur me Diplomë të Ciklit të Dytë të studimeve, duhet të paraqesin një vërtetim nga Universiteti përkatës, ku konfirmohet shlyerja e të gjitha detyrimeve, përfshirë edhe gjuhën e huaj, sipas akteve ligjore dhe nënligjore në fuqi”, nënvizohet në njoftimin e AKP-së.
Sakaq, në ditët që kanë mbetur deri në dhënien e provimit, kandidatët mund të ushtrohen në testime, nëpërmjet aplikacionit të provimeve të shtetit.
Nga ana tjetër, në faqen zyrtare është në dispozicion dhe fondi i pyetjeve dhe programet orientuese për secilin profesion, nga i cili do të përzgjidhen në mënyrë rastësore pyetjet në tezën finale.
