Lionel Mesi nuk do të marrë pjesë në mbrëmjen gata të çmimit “The Best” të organizuar nga FIFA, duke iu bashkuar portugezit Cristiano Ronaldo. Ylli argjentinas kishte planifikuar që të merrte pjesë në këtë ceremoni e cila organizohet në Londër edhe pse nuk ishte emëruar mes tre lojtarëve që rivalizojnë për çmimin e më të mirit, por duket se një problem familjar e ka detyruar atë që të ndërrojë planet.
Gjatë kësaj mbrëmje do të jepet edhe çmimi i portierit të vitit, po ashtu do të zgjidhet edhe formacioni, ku Messi me shumë mundësi do të jetë pjesë e tij. Kjo është një mungesë e dytë e rëndësishme pas asaj të Cristiano Ronaldos, pasi do të mungojnë dy futbollistët më të mirë në botë.
Sulmuesi portugez nuk do të jetë në mbrëmjen gala të FIFA-s, pavarësisht se është në luftë për çmimin e më të mirit, bashkë me Salah dhe Luka Modric. Në fakt, nuk është mbrëmja e parë gala që CR7 humbet këtë vit, sepse në verë ai vendosi të mos marrë pjesë në ceremoninë, që UEFA mbajti në Monako.
Në këtë mënyrë, mbrëmja gala e “The Best” humbet dy yjet e futbollit botëror në dekadën e fundit, “gjahun” më të mirë të mediave. Messi do të pushojë në Barcelonë, ndërsa Cristiano Ronaldo në Torino.
