Lionel Messi, kapiteni i Argjentinës nuk vesh fanellën e kombëtares që pas eliminimit nga Kupa e Botës në Rusi. Por duket se pas një shkëputje prej nëntë muajsh, ai ka vendosur që të rikthehet për herë të dytë në ekipin kombëtar.
Sulmuesi i Barcelonës do të luajë më 22 mars kundër Venezuelës në një ndeshje miqësore në Madrid, i cili do të jetë edhe rikthimi i dytë në përfaqësuese. Pas humbjes 4-3 ndaj Francës, Messi raportoi se do të shkëputej, për tu përqendruar plotësisht tek ekipi i Barcelonës.
Situata e favorshme për të është se nuk do të duhet të udhëtojë shumë, sepse Argjentina do të takohet me Venezuelën në stadiumin Wanda Metropolitano të Madridit. Kujtojmë se gjatë karrierës me kombëtaren 32-vjeçari ka humbur katër finale, një herë në Kupën e Botës dhe tri herë në Copa America.
Messi ka luajtur 128 herë për Argjentinën dhe ka realizuar 65 gola ndërsa më shumë se ai ka luajtur vetëm Javier Mascherano (147) dhe Javier Zanetti (143).
