Drejtori i Përgjithshëm i Burgjeve, Agim Ismaili ka dhënë urdhër që të dënuarit të vetëdeklarojnë numrat që do të telefonojnë çdo muaj, emrin e poseduesit të numrit, por edhe çfarë lidhje ka i burgosuri me personin që po zhvillohet biseda. Ky urdhër është firmosur në maj të 2019. E gjithë kjo po bëhet për të patur një regjistër të lidhjeve familjare dhe miqësore që i dënuari mban me persona të tjerë jashtë qelisë.
Ndër të tjera, Ismaili pohon se e gjitha kjo nuk është shkelje e të drejtave, pasi në urdhër nuk përfshihet raportimi i numrave që një i burgosur mund të telefonojë sa i takon Avokatit të Popullit, Antikorrupsionit, mbrojtësit personal dhe Komitetit Shqiptar të Helsinkit.
“Ai nuk mund të flasë me këdo në telefon. Ka një numër të caktuar telefonatash që mund të kryejë. Ne e dimë kë do marri dhe flet qetësisht. Të njëjtën gjë do bëjmë edhe për rrethin e personave që takon. Po marrim masat edhe për sistemin e hyrjes dhe daljes elektronike, që kushdo që do hyjë në burg të regjistrohet”, deklaroi Ismaili.
Meshkujve u lejohen të kryejnë vetëm tetë telefonata, ndërsa grave dhe të miturve kanë të drejtë të kryejnë 16 telefonata në muaj.
Limitimi i telefonatave, por edhe mbajtja e regjistrit me identitetin e personit që po telefonohet ka ndodhur për shkak të kërcënimeve apo edhe shantazhit përmes telefonit nga të burgosur të njohur.
“Sepse ata që kanë sende të ndaluara dhe mund të komunikojnë edhe për të shantazhuar, gjë që ka ndodhur, kjo është shumë e rëndë, prandaj jemi shumë sensibël për të marrë çdo masë”, tha Agim Ismail.
