E ardhmja e mesfushorit të kombëtares shqiptare, Kamer Qakës, duket se është vendosur tashmë. Ai pritet ti bashkohet ekipit të njohur rumun, Steaua Bukuresht. Duke qenë pjesë e këtij ekipi shanset që Qaka të jetë pjesë e kuqezinjve do të jenë më të mëdha, por ky është edhe një hap mjaft i rëndësishëm për karrierën e tij.
Lajmi konfirmohet nga financieri i këtij klubi, Gigi Becali, që konfirmoi se mesfushori shqiptar do të jetë transferimi i parë në merkaton e verës për Steauan.
Financieri i klubit të Steaua Bukuresht ka konfirmuar se pronari i klubit rumun, Vasile Geambazi i ka thënë se ka arritur të blejë nga Poli Iasi, mesfushorin Kamer Qaka. “Kam biseduar me presidentin e klubit dhe më tha se ka arritur akordin me Poli Iasi për mesfushorin Kamer Qaka”, tha Becali për mediat rumune, por pa zbuluar shifrën e transferimit. Qaka ka bërë një sezon shumë pozitiv me Poli Iasi dhe fitoi një vend në kombëtaren e Shqipërisë.
