Takimi i mbajtur me studentët, ka qenë deri diku frytdhënës për Ramën, e aspak për studentët. Këta të fundit nuk i ndahen tetë kërkesave, e ndërsa kanë vendosur bashkërisht për t’iu rikthyer protestave në janar të vitit të ardhshëm.
Gjatë takimit me studentë të Arkitekturës, Rama u përball me akuza të forta nga ta. Njëra prej studenteve që ishte në sallë, tregoi se ajo kishte shkëmbyer disa mesazhe me Ramën, ndërsa shkaktoi duartrokitje në sallë, pasi ia preu shkurt kryeministrit.
Mbrëmjen e djeshme ajo ishte e ftuar në emisionin “Opinion”, të gazetarit Blendi Fevziu, ku dhe lexoi bisedat e plota me Ramën, të cilat vijojnë si më poshtë:
“Kaq e vështirë është për ju që të zyrtarizoni ato 8 pika, me numër VKM, ashtu si plot të tjera që janë bërë në fushatën tuaj elektorale? Kaq shumë doni të ulni popullin poshtë, sa të thoni se veç me dialog zgjidhen gjërat? Dialogun me ju e kemi dëgjuar shumë herë… me falni, monologun”, ishte ky mesazhi i vajzës e cila u përball edhe dje me Ramën, gjatë takimit që pati me studentët.
“E para prezantohuni se kush jeni, pastaj mbase vazhdojmë bisedën për çfarë keni parë, apo i keni mbushur mendjen vetes se keni parë. Ah, edhe diçka. Popullin mos e ngatërroni fare në këtë mes, se ju, kushdoqofshi, as jeni populli, dhe as nuk flisni dot në emër të tij, që të jemi të qartë”, është mesazhi me të cilin kryeministri i është përgjigjur studentes.
“Jam studente në fakultetin e Arkitekturës. Nuk besoj se është nevoja të nxjerr edhe pemën time familjare. Nuk përfaqësoj askënd, por veten time si studente e revoltuar që në gjithë këto vite, vetëm keni ditur të na zhvasni me vetëdije. Fjala më e saktë do ishte studentët dhe jo populli”, ishte ky mesazhi i studentes.
“Ti, dhe kushdo që mendon si ti, mua më merr të keqen për zhvatjen me vetëdije, dhe paturpësia në lëshimin e këtij lloji të neveritshëm fjalësh, jo vetëm nuk është argument, por flet sa njëmijë fjalë për nivelin e dembelizmit mendor, që në mënyrë kaq spektakolare është shfaqur gjatë gjithë këtyre ditëve”, ishte mesazhi i radhës i Ramës.
“ Domethënë ne jemi dembelë në të menduar? Për ju ne jemi veç disa marioneta që luhemi nga ata që janë mbi ne. Për ju ne jemi ngelësa, mund të më thoni përse? Jemi ngelësa sepse nuk kemi kushtet më minimale si studentë të arkitekturës, dhe detyrohemi të punojmë në ambiente alternative? Për këtë?”, i përgjigjet studentja.
“Jo, nuk mund të them asgjë, nëse nuk tërheq atë togfjalësh të neveritshëm që the më lartë, dhe mos i fol vetës në shumës, sepse është një tjetër shfaqje e dembelizmit mendor”, i është përgjigjur Rama-studentes.
