Një apel rrëqethës vjen këtë herë nga një familje në Lushnje. Ata kërkojnë një ndihmë sado të vogël për të ndërtuar një shtëpi për pesë fëmijët e tyre, ku të mund të jetojnë si të gjithë të tjerët.
Mes varfërisë ekstreme, prindërit e kësaj familjeje rrisin edhe 9-vjeçarin e sëmurë, i cili ka nevojë për kushte të veçanta.
“Më dhemb shpirti për fëmijën e sëmurë”, shprehet kryefamiljarja për Fundjavë Ndryshe. I ati i vogëlushit thotë: “Më dhimbset bashkëshortja ime se vuan shumë me fëmijët. Nuk ka as kushte as asgjë”.
Më tej ai tregon se si u sëmur djali i tij, vite më parë për shkak të temperaturës së lartë. Tashmë, me uljen e temperaturave, prindërit rrëfejnë se jetesa për të e veçanërisht për fëmijën e sëmurë bëhet edhe më e vështirë.
Fundjavë Ndryshe ka publikuar rastin e dhimbshëm në profilin e saj në Facebook, ndërsa apelon që të gjithë bashkë të ndihmojmë sado pak për të ndihmuar këtë familje.
