Tirana iu ka dhënë fund vuajtjeve në Kategorinë e Parë dhe me fitoren e marrë ditën e sotme përballë Pogradecit ka siguruar kthimin në Superiore. Një vit më parë ekipi bardheblu do të përjetonte momentin më të vështirë në histori në “Loro Boriçi”, pas një barazimi të bardhë pa gola që bëri të mos i shpëtonte rënies nga kategoria, që ishte një dramë për tifozët dhe për futbollin shqiptar.
Me marrjen në pankinë të brazilianit Ze Maria dhe me investimin e mirë në merkato, Tirana u vu re qartë që në ndeshjet e para që ishte tjetër nivel nga rivalët, vetëm Bylis kishte fuqi që ta rivalizonte deri diku. Por ekipi që ndërtoi braziliani dhe futbolli që ata tregonin në fushë bëri që makthi të merrte fund shumë shpejt dhe akoma pa mbaruar sezoni të siguronin largimin nga Kategoria e Parë.
Sa i takon ndeshjes së sotme, kundër Pogradecit, kryeqytetasit kanë fituar pa shumë vështirësi. Fillimisht ka qenë Hysenllari, në minutën e 27-të, që ka shkaktuar autogol në portën e vet. Pastaj, në pjesën e dytë, në minutën e 58-të, Halili, djali i presidentit të klubit bardheblu, ka dyfishuar shifrat.
Greca, në minutën e 80-të, ka vulosur gjithçka, duke vënë në shina të sigurta trepikëshin, i cili përmbyll edhe matematikisht kryesimin e Grupit B dhe rikthimin në Superiore, pavarësisht se do të luajë edhe pak ndeshje në Kategorinë e Parë. Goli i Shytit, i ndihmuar nga devijimi i Maveje, në minutën e 64-t, pastaj ai i minutës së 83-të, me autor Albi Cekicin, ka qenë vetëm për statistikë, në favor të miqve.
Tirana është klubi me më shumë tituj në Shqipëri, që i ka dhënë tonin kampionatit të futbollit, ndaj rikthimi në Superiore është një lajm i mirë jo vetëm për bardheblutë, por për të gjithë futbolldashësit në vend.
