Kancelarja gjermane Angela Merkel ka marrë dozën e dytë të vaksinës kundër koronavirusit. Por ndryshe nga herën e parë, kur ajo mori vaksinën AstraZeneca, kancelarja gjermane zgjodhi që dozën e dytë të aplikonte vaksinën e Modernas, shkruan BBC.
Lajmi u konfirmua nga zëdhënësi i qeverisë, Steffen Seibert, i cili saktësoi se Merkel zgjodhi mënyrën e vaksinimit heterolog. Të njëjtën mënyrë vaksinimi do të aplikojë dhe kryeministri i Italisë, Mario Draghi, i cili gjithashtu ka marrë në dozën e parë vaksinën e AstraZeneca.
Në muajin mars, Gjermania, së bashku me vendet e tjera evropiane, ndaluan shpërndarjen e vaksinës AstraZeneca pasi u raportuan një numër rastesh të mpiksjes së gjakut.
Pas një fillimi të ngadaltë, procesi i vaksinimeve në Gjermani u përshpejtua javët e fundit. Më shumë se gjysma e popullsisë së vendit tani ka marrë dozën e parë të një vaksine.
