Paraqitja mbresëlënëse në Evropian e ktheu 18 vjeçarin Pedro Gonzales Lopez, i njohur shkurt si “Pedri” emri më i lakuar në këtë merkato verore. Mesfushori i skuadrës së Barcelonës është kthyer tashmë në një nga objektivat kryesorë të shumë skuadrave të mëdha. Mançester Siti, Juventus dhe së fundmi Bajern kanë shfaqur interes për talentin 18-vjeçar, vlera e të cilit ka shkuar menjëherë në shifrën e 80 milion eurove.
Të parët janë kampionët e Gjermanisë që kanë shfaqur interes për mesfushorin, dhe sipas “TV Sky”, palët mund të ulen për të biseduar rreth një transferimi të bujshëm që mund të realizohet në këtë merkato të nxehtë.
Edhe pse trajneri i ri i Bajern, Nagelsman, përjashtoi goditje të mëdha në merkato, drejtuesit e klubit bavarez kërkojnë t’i bëjnë trajnerit të ri një dhuratë, të cilën ai, me shumë gjasa, nuk do ta refuzonte. Sipas ekspertëve gjermanë të futbollit, Pedri do të ishte perfekt në mesin e fushës dhe se bashku me Kimish dhe Goreckën do të formonte një trekëndësh të frikshëm te kampionët e Gjermanisë.
Ndërkohë, mësohet se Bajerni nuk është ende i gatshëm për të ofruar 80 milion euro për lojtarin dhe mund të përfshijë në tentativë edhe lojtarë si Kingslei Koman. Por ndoshta katalanasit do të preferonin një blerje me “cash” për lojtarin e tyre, për të balancuar arkën e klubit.
