“Ne shqiptarët e Maqedonisë e veçanërisht Tetova duhet të vazhdojë të jetë djep i kulturës dhe civilizimit të shqiptarëve”, porositi sonte kreu i Partisë Demokratike Shqiptare, Menduh Thaçi, në tubimin qendror në sheshin e qytetit ku u prezentua kandidati për kryetar komune dhe lista e këshilltarëve.
Thaçi simpatizantëve të partisë dhe qytetarëve ju bëri thirrje për përkrahje masive për kandidatët e PDSh-së në Zgjedhjet e 15 tetorit duke i porositur që të mos bien pre e manipulimeve për “vëllazërim-bashkim”.
“Ne jemi pjesë e kombit shqiptar dhe nuk duhet të biem pre e manipulimeve të dikujt se duhet të integrohemi me dikë tjetër. Ne shqiptarët e Maqedonisë e sidomos Tetova duhet të vazhdojë të jetë djep i kulturës dhe civilizimit të shqiptarëve. Vota juaj më 15 tetor do të përcaktojë këtë orientim të shqiptarëve të Maqedonisë”, tha Thaçi në tubim.
Ai më tej potencoi se nuk mundet që qytetet e maqedonasve të zhvillohen me të gjitha kushtet ndërsa qytete shqiptare të mos kenë as kushtet elementare.
