Kreu i Partisë Republikane Fatmir Mediu e cilëson nismën e ndërmarrë nga 6 kryeministrat e Ballkanit për krijimin e një tregu të përbashkët rajonal si tejet të nxitur kur për këtë çështje nuk janë pyetur ekspertët.
Sipas Mediut, kryeministri Rama nuk ka marrë në konsideratë asnjë mendim eksperti se cilat janë avantazhet nga krijimi i këtij tregu dhe se qytetarët nuk dinë asgjë rreth kësaj iniciative ekonomike.
Gjithashtu, Mediu ironizon Ramën, duke thënë se nuk pret prej kryeministrit të Shqipërisë dhe “vëllait” të tij Aleksandër Vuçiç, që të japin vendime për ekonominë e rajonit, duke shtuar se një aktor i rëndësishëm që po lihet jashtë është dhe Amerika.
“Asnjë ide nuk është për t’u përkrahur apo hedhur poshtë apriori. Krijimi i një tregu ballkanik ka anët e veta pozitive dhe negative. Kjo marrëdhënie nuk mund të jetë monopol i një njeriu qofte ky kryeministri. Ai duhet të jetë rezultat i një gjykimi ekspertësh ekonomikë dhe vendimi gjithëpërfshirës politikë, mbi të gjitha më shumë transparencë me opinionin publik”, shkruan Mediu në profilin e tij në Facebook.
