Ish-deputeti i Partisë Socialiste dhe analisti Alfred Peza, parashikon një verë të nxehtë sa i takon situatës politike, teksa u shpreh se shpallja ”non grata” e ish-kryeministrit Sali Berisha nga DASH, mund të pasohet me të tjerë persona të rëndësishëm, të nivelit të tij.
Deklarata e Pezës, u bë mbrëmjen e sotme në emisionin ”Open” në Top Channel. Sipas tij, fokusi amerikan është vendosur mbi personat që kanë të bëjnë me çështjet e korrupsionit të nivelit të lartë.
Ndër të tjera, Peza citoi ambasadoren amerikane Yuri Kim, e cila tha ditën e sotme se ka edhe një kategori tjetër, që do të jetë në vëmendje të SHBA-ve.
Pjesë nga biseda
Alfred Peza: Nisur nga dinamika me të cilën SHBA kanë shpallur persona “non grata” në Shqipëri në lidhje me ato përmbajtje që janë pasqyruar në urdhrat e sekretarëve amerikanë të shtetit, por edhe nisur nga urdhri i presidentit Joe Biden, besoj që javët në vazhdim mund të ketë persona të tjerë të rëndësishëm politikë që mund të goditen në Shqipëri të nivelit të Sali Berishës apo afër tij, në pikëpamje të asaj çfarë përfaqësojnë politikisht.
Jo vetëm në fushën politike, por ndoshta edhe në fusha të tjera. Fokusi amerikan është vendosur mbi personat që kanë të bëjnë me çështjet e korrupsionit të nivelit të lartë. Jo më larg se sot edhe vetë ambasadorja Kim theksoi se edhe një kategori tjetër për të cilët SHBA-të do të tregohen shumë të kujdesshëm. Them se do të jetë një verë e nxehtë, jo për nga temperaturat. Do ketë një listë me emra të fushave të tjera që mund të shpallen non-grata.
Eni Vasili: Mediat, oligarkia…çfarë quan fusha të tjera ti?
Alfred Peza: Ja i the ti disa fusha, do të jenë niveli i Sali Berishës dhe jo vetëm…
