Një person është dhunuar keq në burg, pasi u akuzua me pa të drejtë teksa Babis Anagnostopulos kishte krijuar një skenar sikur e kishin grabitur e më pas i kishin vrarë gruan. Gjeorgjiani i arrestuar në Greqi për vrasjen e Carolinës, Giorgio Khardzeishvili ka treguar dhunën që ka pësuar në burgjet e Greqisë. Në një intervistë për ImediTV në Gjeorgji, ai u shpreh se në Greqi e kanë lidhur në karrige për katër ditë dhe e kanë dhunuar në mënyrë çnjerëzore.
Dëmet kanë qenë të mëdha, e madje ka pësuar tronditje në tru. Të burgosurit, të revoltuar për çfarë ka ndodhur, e kanë pyetur se si ai kishte vrarë Carolinën, një akt që në të vërtetë nuk ka ndodhur prej tij, por prej bashkëshortit të së ndjerës.
“Unë isha i lidhur në një karrige për katër ditë. Ata më rrahën shumë, nuk e merrni dot me mend, kur dikush lodhej, një tjetër më godiste. Ishin disa persona.
Pësova tronditje në tru. Nuk kishte asnjë pyetje. Kur më sollën në Athinë, menjëherë ata më rrahën. Dhe ata thjesht thanë: “Më thuaj, si e vrave, si u fute, si dolët?”. Nuk kishte pyetje të tjera. Nuk e dija për cilën vajzë po flisnin. Ata më thanë: “Ti e vrave atë”, u shpreh ai.
Ndonëse u zbulua e vërteta, për të asgjë nuk kishte përfunduar. Ai u shpreh se pasi mori vesh që bashkëshorti i saj ka pranuar fajin, e kanë akuzuar për vjedhje.
“Pastaj zbulova se burri i saj e kishte vrarë, dhe se unë isha akuzuar për vjedhje. Unë nuk kam asgjë me vjedhje. Unë kisha vetëm dokumente false”, tha ai.
Giorgio Khardzeishvili ka rrëfyer më tej se mbi të rëndonte akuza për dokumente false, dhe për asnjë vrasje apo vjedhje. Dhuna ndaj gjeorgjianit erdhi pas historinë së sajuar të 32-vjeçarit, ku përfshiu dhe shqiptarët.
