Presidenti Ilir Meta ka komentuar arrestimin e Klement Balilit nga Lezha. Meta përshëndeti ndalimin, si dhe falënderoi agjencitë ligjzbatuese, por edhe partnerët ndërkombëtarë për presionin e gjithanshëm që çoi në vetëdorëzimin e Balilit.
Po ashtu, Meta komentoi edhe nëse do e dekretojë kryeministrin Rama si ministër të Jashtëm, teksa tha se do të japë një përgjigje “të qartë, të përgjegjshme, shteruese, me qetësi, por pa dashuri, brenda afateve kushtetuese.”
Pyetje: Zoti Meta, a do ta dekretoni kryeministrin si ministër të Jashtëm?
Presidenti Meta: Këtu jemi për të promovuar edhe një herë solidaritetin për dhurimin e gjakut. Për këtë çështje besoj se e kam dhënë një përgjigje dje. Dhe do të jap një përgjigje të qartë, të përgjegjshme, shteruese, me qetësi, por pa dashuri, brenda afateve kushtetuese.
Pyetje: Si e komentoni dorëzimin e Klement Balilit?
Presidenti Meta: E përshëndes ndalimin e Klement Balilit, një person me mjaft probleme me ligjin. Dhe me këtë rast dua të falënderoj jo vetëm agjencitë ligjzbatuese, por edhe partnerët tanë ndërkombëtarë, për presionin e gjithanshëm për të arritur këtë rezultat sot.
