Transferimi i Cristiano Ronaldos tek Juventusi duket se i ka trembur rivalët e Serie A. Është Daniele De Rossi, mesfushori i Romës ai që shprehet i sinqertë dhe thotë se bardhezinjtë tashmë janë një tjetër nivel. 34-vjeçari shprehet se ‘zonja e vjetër’ me këtë lëvizje ka rritur diferencat me skuadrat ndjekëse, në një kohë kur ka fituar 7 kampionate radhazi.
“Ardhja e Cristiano Ronaldo është një gjë e mirë për futbollin italian, por kryesisht për Juventus, që e ka marrë. Do të thotë se kërkon të shkojë më lart. Të fitosh 7 kampionate radhazi, do të thotë se po i bën gjërat si duhet. Mund të thuhet se e ka vrarë kampionatin duke marrë lojtarin më të fortë në botë ose të dytin më të mirë,”-deklaron fillimisht mesfushori i cili duket i dorëzuar ende pa nisur “Seria A”.
De Rossi duket se e vlerëson maksimalisht Ronaldon, por ai e ka cilësuar si më të fortin në botë, ndërsa si më të mirin e ka nxjerrë në plan të dytë, duke e thumbuar në lidhje me rivalitetin me Lionel Messin. “Më pas ndeshjet duhen luajtur, ai do të duhet të përshtatet, nuk është gjithçka e shkruar, këtë mendoj se e dinë edhe Allegri me lojtarët. Por, në letër ata janë tre hapa para të tjerëve. Ndoshta do të synojnë Champions-in dhe kampionatin e mendojnë të fituar. Nuk është e thënë që të ndodhë kështu”, ka përfunduar De Rossi.
