Kreu i grupit parlamentar të LSI-së, Petrit Vasili ka hedhur një lumë akuza ndaj kryetarit dhe nënkryetares në Komisionin e Ligjeve, Ulsi Manja dhe Vasilika Hysi. Në një konferencë për shtyp nga selia e LSI-së, Vasili tha se Manja dhe Hysi po përpiqen t’i gjejnë alibinë mashtrimit të radhës.
Gjithashtu, deputeti i LSI-së dekaroi se Ulsi Manja është gati të shkatërrojë edhe reformën në drejtësi. Ai tha se socialistet i kërkuan të fusnin përgjuesit deri në krevatet e shqiptarëve.
Ndërkohë më herët, Ulsi Manja dhe Vasilika Hysi kanë dhënë sqarime për ndryshimet në kodin e procedurës penale duke thënë se gjithçka është vetëm baltë e opozitës
“Manja dhe Hysi u përpoqën t’i gjejnë alibinë mashtrimit të radhës. Të dy gënjeshtarët, të pacipë, treguan qytetarëve që neni 491 ishte votuar duke thënë se ishin dakord. Ju e patë, se nuk e fshihnin dot se të njëjtin procesverbal kishim dhe ne në dorë. Ndryshimi nuk u tha, nuk u verbalizua, e shndërroi komunikimin zyrtar në lojë email-esh, e të gjitha mjetesh tjera informale të komunikimit.
Dëgjuam dhe gënjeshtrën e Ulsi Manjës, që është gati të shkatërrojë edhe reformën në drejtësi. Kërkuan të fusnin përgjuesit deri në krevatet e shqiptarëve, kam luftuar kur isha ministër drejtësie kundër këtyre.
Manipulimi është i dukshëm për të tërë. Dua të di ç’bën prokuroria kur manipulimi është sheshit. Vazhdon e mbyll gojën. Nuk lëviz as gishtin kur dalin e flasin mashtruesit aty. Dokumentet janë kaq të qarta për të kuptuar që manipulimi është aty,” tha Vasili.
