Një nga lajmet e botës së showbiz-it që ka bërë bujë të madhe në vitin 2003-të ka qenë sherri mes dy këngëtareve të njohura Adelina Ismailit dhe Leonora Jakupit.
Për të gjithë ata që nuk janë të familjarizuar me informacionin në fjalë, rikujtojmë se dy yjet e skenës muzikore shqiptare u përleshën me njëra-tjetrën në prapaskenat e një koncerti ku bëheshin parapërgatitjet për regjistrimet e një spektakli për Vitin e Ri.
16 vite më pas, e ftuar në studion e emisionit “Pressing”, Adelina Ismaili ka rrëfyer për herë të parë se arsyeja përse ajo ishte përleshur me Jakupin ishte pikërisht nëna e saj e ndjerë, Mona: “Po, ka pasur përleshje, por pse ka ndodhur kjo nuk e di. Mamin e ka goditur pak Leonora së pari. Mbaj mend se ishte një gardërobë e ngushtë, ajo kaloi dhe goditi mamin. Mami i bërtiti pak për shkak të stresit të xhirimeve. Kur mami i tha ‘kujdes’, ajo e kapi prej fyti dhe aty ndërhyra unë”.
Ndërkohë, në vijim Ismaili pohoi: “Unë ende nuk e kam të qartë nëse jemi apo jo rivale, por sinqerisht e them se nuk kam xhelozi për askënd, e aq më pak për një vajzë të re, e për më tepër për një këngëtare që ka kënduar në Koshare dhe ka kënduar për ushtarët, unë nuk mundem ta urrej. Çfarë ka ndodhur, ka ndodhur gjithmonë prej palës tjetër”.
