Arben Imami thotë se do të kishte dhënë dorëheqjen nga kandidatura për anëtar në Këshillin Kombëtar, siç bënë shumë kolegë të tij, por Basha nuk ia dha as këtë kënaqësi, duke e lënë jashtë listave. Ai ka lëshuar një lum akuzash ndaj kreut demokrat, duke e cilësuar si përfitues të punës, djersës dhe gjakut të kësaj force politike. Madje ai konfirmoi më tej se nuk ka mbajtur kontaktet me kreun e PD-së.
“Po të isha në listën e Këshillit Kombëtar, do të kisha bërë të njëjtën gjë që bënë disa kolegë të tjerë. Por kjo është një gjë që duhet ta zgjidhja unë. Basha e hoqi emrin tim nga lista e Këshillit Kombëtar, megjithëse Këshilli Kombëtar i vjetër do të votohej i gjithi së bashku. Pasi ka bërë të gjitha këto, thotë hajde bashkohemi. Për çfarë të bashkohemi? Nuk më bashkon asgjë me z. Basha. Eshtë përfitues i punës, djersës dhe gjakut të PD. E rrënoi atë parti. Me të personalisht nuk kam asnjë pikë kontakti”, tha ai për “Ora News”.
Ai është rrëfyer më tej se Basha e pati shansin të bashkonte partinë, por me qëllim e mbylli atë rrugë. Për Imamin, Basha nuk ka reflektuar.
“Kishte një shans, ja dhamë këtë shans në një vit e gjysmë të reflektonte. Mund të propozonte çfarëdolloj kompromisi të hapur dhe të ndershëm, por nuk mund të fusë njerëz për të bërë kompromise të ndyra. Nuk kam bërë kompromise me njerëz shumë më të nivelit të lartë sesa ky mashtrues. Më kanë bërë propozime të rëndësishme në ’90. Nuk mund ti mbyllë gojën me oferta të tilla askujt. Një kompromis i hapur, i shëndetshëm sigurisht që do ti shërbente PD dhe unë personalisht, dhe jo vetëm unë. Ja kemi ofruar në këtë vit e gjysmë që kur bëri shitjen e zgjedhjeve të PS, ai e ka mbyllur vetë atë rrugë”.
Për Arben Imamin, mbledhja e Kongresit ishte në kundërshtim me rregulloren e partisë. Sipas tij, nuk kishte asnjë surprizë, dhe se me këtë, ka vulosur përçarjen e PD.
“Ishte e qartë se do shkonte në këtë mënyrë. Nuk kishte asnjë surprizë. Me këtë po vulos përçarjen e PD që e shkaktoi ai. Bashkimi dhe harmonia mund të krijohen vetëm mbi bazën e rregullit të mirëpranuar. Nëse prishet ky rregull, dhe dëmton lirinë e personit dhe drejtësinë, nuk ka shanse për bashkim. Këtë ka bërë Basha”.
Për pjesëmarrësit në Kongresin e PD-së ndjen keqardhje, pasi siç thotë ai, i bënë një varrim kolektiv një vlere të madhe të politikës shqiptare. Ai pyet se ku janë anëtarët? Për rrjedhojë, Basha vijon me të njëjtën mënyrë, duke marrë të gjitha veprimet vetë.
“Ku janë 7000 anëtarë? Lista ka 7 000, aty nuk janë 7000. Premtoi se nuk do vepronte më, pa pyetur forumet. Vijon në të njëjtën mënyrë, të gjitha vendimet i merr në mënyrë autokratike i vetëm. Ku është forca e këtij njeriu? Heshtja e atyre që shkojnë në Kongres dhe mendojnë se mos ka një shans, por në fakt janë duke bërë një varrim kolektiv të një vlere të madhe të politikës shqiptare”.
