Pasi institucioni i Presidencës njoftoi se Ilir Meta nuk ka dekretuar Sandër Lleshin si ministrin e ri të Brendshëm, burime për “Tirana Today” thonë se kryeministri nuk do të propozojë një kandidaturë të re, për të zëvendësuar Fatmir Xhafën, pas mosdekretimit të Lleshit si ministër.
Të njëjtat burime konfirmojnë se Rama pritet të emërojë si zëvendësministër të Brendshëm, Sandër Lleshin. Sandër Lleshi do të ketë emërimin si zv.ministër i Punëve të Brendshme, por me atribute për të drejtuar këtë dikaster shumë të rëndësishëm.
Ky është precendet që Kryeministri Edi Rama e ka vënë në zbatim edhe më parë. Rast konkret është Shërbimi Informativ Shtetëror, i cili drejtohet nga zv.drejtori i Përgjithshëm, Helidon Bendo.
Ky i fundit u propozua nga Edi Rama për të qenë drejtori i Përgjithshëm i SHISH, në vend të Visho Ajazi Likës, por Helidon Bendo sot e kësaj dite nuk ka marrë ende pëlqimin e Ilir Metës me dekret.
Si i tillë, Helidon Bendo drejton Shërbimin Informativ Shtetëror, por nga pozitat e zv.drejtorit të Përgjithshëm.
E njëjta skemë pritet të ndiqet nga Kryeministri Rama edhe për Sandër Lleshin, i cili do të jetë drejtuesi i Ministrisë së Brendshme, por nga funksioni i zv.ministrit. Pra me emërim direkt nga Kryeministri, por me rrogë më të ulët.
