Ish-komandanti i FSK-së, Kadri Kastrati, ka thënë se më 2014, SHBA-ja e mbështeti krijimin e Ushtrisë së Kosovës, por kjo nuk kishte ndodhur për shkak të mosmarrëveshjeve në mes spektrit politik vendor.
“Në mars të 2014 FSK ka qenë e gatshme të shndërrohet në ushtri, dhe janë dorëzuar komplet rekomandimet që kanë dal nga rishikimi strategjik. Pse nuk është bërë atëherë, tashmë dihet për opinionin, për shkak të mosmarrëveshjeve të spektrit politik vendor. Ndërkombëtarët kanë qenë të përgatitur dhe ka qenë e mbështetur fuqishëm nga SHBA-të, por nuk është bërë”, ka thënë Kastrati për Arbresh.info.
Ai theksoi se forma më e mirë për krijimin e Ushtrisë do të ishte ajo me ndryshime kushtetuese, por, sipas tij, kjo është e pamundur për shkak të Listës Serbe.
“Forma më e mirë do të ishte me ndryshime Kushtetuese, por serbët janë pengesë, sepse ata përfaqësojnë interesat e Beogradit. Mendoj se presidenti ka bërë një punë të madhe dhe një iniciativë të mirë, se nëse nuk votojnë serbët, mund ta bëjmë ushtrinë edhe me ligj”, ka thënë Kastrati.
