Conor McGregori mung të marrë një dënim të rëndë dhe mund të mos jetë pjesë e UFC-219, pas incidentit që shkaktoi pak ditë më parë në fundin e një dueli në eventin e Bellator 187. Ai u fut në kafaz dhe kërcënoi gjyqtarin e ndeshjes dhe kjo mundtë sjellë një dënim mjaft të rëndë duke e pezulluar rikthimin e tij në kafaz. Ai që ka ngritur zërin është presidenti i Association Boxing Commissions (ABC), Mike Mazzulli.
Mazzulli i ka kërkuar presidentit të UFC-së, Dana White, të përjashtojë irlandezin nga eventi i UFC-219, ku McGregor pritet të mbrojë titullin kampion ndaj Tony Ferguson. “Ajo që bëri McGregor është e papranueshme dhe e patolerueshme për këdo dhe drejtuesit e UFC-së duhet të marrin urgjentisht masa. Ata më garantuan se edhe pse McGreor ishte planifikuar për të dueluar në UFC-219, do ta përjashtojnë nga ky event”, u shpreh Mike Mazzulli, që i referohet një bisede telefonike që ka bërë me përfaqësuesit e arteve marciale mikse (MMA).
Gjithsesi, ende nuk konfirmohet nga UFC-ja apo nga presidenti i saj Dana White nëse irlandezi do të lihet jashtë eventit të UFC-219, që zhvillohet më 30 dhjetor, në Las Vegas. McGregor bëri një gjest të shëmtuar në eventin e Bellator 187, kur hyri në kafaz për të festuar dhe më pas tentoi të sulmojë gjyqtarin, por u ndalua nga punonjësit e sigurisë. Irlandezi pritet të mbrojë titullin kampion ndaj Ferguson, ndërkohë që nuk duelon në kafaz që prej një viti. Në gusht të këtij viti, ai debutoi në sportin e boksit, ku u mund me “KO teknik” në raundin e 11-të nga Floyd Mayweather.