Tre ditë para përplasjes më të madhe të vitit McGregor dhe Mayweather mbërritën në Las Vegas, ku nuk i kursyen provokimet dhe përbuzjet ndaj njëri -tjetrit, duke ruajtur të njëjtën linjë sjelljeje që kur u zyrtarizua sfida mes tyre.
I pari u shfaq amerikani Mayweather i shoqëruar nga truprojat e tij, në skenën para T Mobile Arena, ku një prej boksierëve më të mirë të të gjitha kohërave do të sfidohet nga ylli i arteve marciale të përziera.
Për shkak të moshës dhe dy viteve larg ringut, Floyd Mayweather nuk konsiderohet favorit dhe sipas tij është ky perceptim që e bën edhe më të bukur këtë sfidë.
“Nuk e dimë se çfarë do të ndodhë. Nuk ndeshem prej dy vitesh dhe e ndjej se kam humbur diçka. Kjo e bën më të bukur këtë ndeshje sepse nuk konsiderohem favorit. Shpresoj që të shtunën t’i gëzoj fansat e mi, që po e presin me padurim këtë duel. Do të jetë një pjesë e historisë.
Ka fituar 12 tituj botëror duke mbetur i pamposhtur në 49 duele. Maney Man shpreson se do ta hedhë në tapet duke i dhënë një mësim të mirë edhe kampionit e UFC, 11 vite më të ri se ai, transmeton Supersport.
Irlandezi McGregor deklaroi i bindur se nuk do t’i duhet shumë kohë për ta mposhtur rivalin e tij 40-vjeçar.
“Kjo ndeshje nuk do të zgjasë 12 raunde. Nëse doni mund të vini bast me mua. Do ta rrah keq. Madje për mua do të jetë fitorja më e lehtë që kam arritur në karrierë. Të shtunën do t’ju tregoj se jam një njeri i veçantë. Do të vendoset gjithçka brenda raundit të parë ose të dytë, do ta bëj të ndihet keq.
Deklarata këto të zakonshme para çdo sfide boksi, por sigurisht kjo mes McGregor dhe Maywaether do të jetë e veçantë, me statistikat më të çmendura të historisë së boksit.
Pritet që nga ky duel përfitimet t’i kalojnë 500 milionë dollarë, teksa për ta ndjekur nëpërmjet televizorit duhet të shpenzosh 85 euro. Ekzistojnë edhe disa klauzola të sjelljes: është parashikuar që për McGregor do të ketë penalizime financiare nëse kryen goditje jashtë rregullave të boksit.
