Një ngjarje tragjike ka ndodhur ditën e sotme, jashtë kufijve të Libisë, ku një anije u mbyt duke lënë të paktën 100 persona të vdekur.
Mësohet se anija ishte nisur nga Libia dhe kishte mbi 300 pasagjerë që udhëtonin. Sipas UNHCR-së, 140 persona janë shpëtuar dhe janë kthyer në Libi.
“Lajm tragjik për një anije të mbytur jashtë kufijve të Al Khoms. Raportet paraprake tregojnë se mbi 100 persona mund të kenë humbur jetën, ndërsa 140 persona janë shpëtuar dhe janë dërguar në një vend të sigurt, ku po marrin shërbimet mjekësore dhe asistencë nga partneri i UNHCR-së, IMC”, shkruhet në postimin e UNHCR Libia.
Të mbijetuarit janë shpëtuar dhe janë kthyer në bregdet, nga peshkatarët dhe rojet bregdetare të Libisë.
Ndërkohë që zëdhënësi i UNHCR-së për Mesdheun dhe Afrikën, Charlie Yaxley u shpreh se sipas dëshmive të të mbijetuarve, vlerësohet se rreth 150 njerëz kanë vdekur në det. Dy persona janë transferuar menjëherë në spital në gjendje kritike.
Shumë emigrantë nga Libia përpiqen të arrijnë në Evropë në anije. UNHCR dhe agjencitë e tjera të OKB-së kanë bërë thirrje që të mbijetuarit të mos kthehen në zonën e konfliktit./Tirana Today
