Kreu i Shoqatës Shqiptare të Turoperatorëve & Agjencive Turistike, Klinton Gërxhani tha se mbyllja e këtij hoteli me pesë yje do të ketë pasoja të drejtpërdrejta në ekonominë e vendit. Në intervistën e dhënë për ‘’Fax News” ai ngriti shqetësimin se pse nuk ka reaguar shteti në një situatë të tillë. Rrjeti i njohur i hotelerisë ‘Sheraton’, që prej 14 vitesh ishte prezent edhe në Shqipëri, do të largohet nga vendi tonë në muajin janar (lajmin e plotë lexoje këtu).
Po ashtu kreu i shoqatës u shpreh se Shqipëria humb ndjeshëm pozicione dhe me vendet e tjera të rajonit të cilët tashmë kanë nga 7-8 hotele me pesë yje. Më tej Gërxhani u shpreh se ”’Sheraton” u vu në pozitë të pandershme me nismën e re të qeverisë për hotelet e reja që do hapen me pesë yje, të cilët do përjashtoheshin nga taksat.
“Unë mendoj se njerëzit që kanë punuar nuk do të ngelen të papunë pasi do të jenë shumë të kërkuar në hotelet e tjera. Si ka mundësi që shteti të mos të ndërhyjë në këtë situatë?!
Është një kambanë alarmi në lidhje me turizmin. ‘’Sheraton” nuk përfitonte nga heqja e taksës për hotelet me pesë yje, kjo e vinte atë në një konkurrencë jo normale. Si mund të vij një grup paralel kur dikush sapo iku?!
Dëmi më i madh që i bëhet Shqipërisë është garancia që i jepte çdokujt për t’u akomoduar. Turistët që ai tërhiqte ishin të nivelit të lartë, duke përfshirë investitorë dhe president, këngëtarë apo personalitete të tjera. Ne po bëjmë të kundërtën e asaj që duam”, u shpreh Klinton Gërxhani.
