Gjatë kësaj fundjave, “Rruga e Durrësit” do jetë e mbyllur për qarkullimin e mjeteve. Kjo pasi Bashkia e Tiranës do të hedhë shtresën e fundit të asfaltit në “Rrugën e Durrësit”, si dhe do të vendosë të gjithë sinjalistikën e nevojshme, që ajo të jetë gati të hënën për banorët. Duke nisur nga ora 22:00 e së premtes, 13 nëntor, e deri në orën 06:00 të së hënës, 16 nëntor, qarkullimi në këtë rrugë do të jetë i kufizuar.
Sipas njoftimit të Bashkisë, do të kufizohet qarkullimi në “Rrugën e Durrësit”, nga sheshi “Skënderbej” deri në sheshin “Karl Topia”, dhe në rrugën “Mine Peza”, nga ish-Kafe Flora deri në rrugën “Fortuzi”.
Ndërkaq, është parashikuar që linjat e transportit publik që qarkullojnë me drejtim Qendër-rruga “Dritan Hoxha”, do të devijohen për në rrugën e “Kavajës”, “Muhamet Gjollesha”, Sheshi “Karl Topia”.
Drejtimi rruga “Dritan Hoxha” për në qendër, do të vazhdojë itinerari i përcaktuar nga rruga “Teodor Keko”, dhe rruga e “Kavajës”. Qarkullimi i mjeteve të Emergjencës dhe Policisë së Shtetit, do të jetë i mundur gjatë gjithë fazës ndërtimore.
