Rusia praktikisht ka siguruar kalimin përtej fazës së grupeve pas fitores 3-1 përballë Egjiptit. Ndërsa për këta të fundit kjo humbje ishte fatale dhe i shuan shpresat për të vazhduar ëndrrën në Botëror. Në stadiumin St. Petersburg rusët treguan edhe njëherë se janë një ekip solid dhe për tu mposhtur në këtë Kupë Bote, pasi kemi parë që të gjitha ekipet e mëdha kanë dështuar në provën e parë..
Rikthimi i Mohamed Salah nuk e ka ndihmuar aspak Egjiptin në këtë ndeshje, pasi nuk arritën të dalin asnjëherë në lojën e tyre përballë presionit të madh që ushtronin rusët. Pjesa e parë ishte e barabartë dhe pa shumë mundësi goli, por në të dytën shpërthen Rusia. Goli i parë erdhi nga një gafë e kapitenit të ekipit Fathy i cili godet topin keq duke e futur në rrjetën e tij.
Një gol që ka ulur moralin e egjiptianëve, të cilët goditen me dy gola rrufe njëri pas tjetrit nga Cheryshev dhe Dzyuba. Ishte Salah, i cili për shumicën e kohës ka qenë në hije, ai që shënoi golin e nderit nga pika e bardhë e penalltisë.
Rusët me 99% avancojnë, presin Uruguain për ta konfirmuar, ndërsa Egjipti gjithashtu pret Uruguain për të njohur fatin e tij.
