Vitore Sallaku, akrobate, një ndër pionieret e Cirkut shqiptar ka mbyllur sytë përgjithmonë. Artistja e njohur shqiptare Vitore Sallaku është ndarë sot nga jeta. Lajmin e ka njoftuar Ministrja e Kulturës, Elva Margariti. Sallaku ishte një nga themelueset e Cirkut shqiptar.
“Një grua e rrallë, energjike, një artiste e talentuar, një nga themelueset e Cirkut shqiptar, u nda nga ne. Akrobatja Vitore Sallaku ka lënë pas kaq shumë kujtime të bukura dhe u ka falur kaq shumë gëzim njerëzve, saqë largimi do të jetë vetëm fizik!
Ajo ishte dhe do të mbetet një shkollë për brezat e rinj!”, shkruan në rrjetin social Facebook ministrja Margariti.
VITORE SALLAKU (RASHA)
“Artiste e Merituar”, “Mjeshtre e Madhe”
Lindi në Tiranë. Ka mbaruar Institutin e Kulturës Fizike “Vojo Kushi”. Ka kryer dy specializime, për katër muaj në ish -BS dhe një vit në Kinë. Vitore Sallaku është një emër shumë i njohur në artin fisnik e të guximshëm të Cirkut. “Artistja pa kocka me dhimbje deri në kockë”, apo “Artistja që sfidoi kohën”, këta janë dy nga titujt e artikujve të shumtë që janë shkruar për Vitoren.
