Ministri në detyrë për Evropën dhe Punët e Jashtme, Gent Cakaj, zhvilloi një takim me zëvendës kryeministrin e Kosovës, Besnik Tahiri.
Në një reagim në Facebook, Cakaj u shpreh lidhur me takimin se në fokus ishin bisedat e fundit para mbledhjes së 2 tetorit mes dy qeverive, për të zgjeruar bashkëpunimin në fushën e ekonomisë e arsimit, si dhe për të mos lënë mënjanë as mbështetjen për shqiptarët në rajon.
Postimi i Cakajt në Facebook
”Kënaqësi të takoja sot edhe Zëvendëskryeministrin e Kosovës, z. Besnik Tahiri, për të mbyllur bisedat e fundit para mbledhjes së 2 tetorit mes dy qeverive, për të zgjeruar bashkëpunimin në fushën e ekonomisë, arsimit e për të mos e lënë anash as mbështetjen për shqiptarët në rajon.”
Mbledhja e dy qeverive në Shkodër
Qeveritë e dy vendeve kishin planifikuar të mblidheshin këtë të premte, 25 shtator, në Shkodër, por për shkak të zhvillimit të seancës së Kosovës në të njëjtën ditë, mbledhja u shty për në 2 tetor.
Mbledhja e përbashkët e 2 tetorit do të jetë mbledhja e gjashtë e përbashkët e dy qeverive. Mbledhja e parë e përbashkët u mbajt më 11 janar të vitit 2014 në Prizren dhe drejtohej nga kryeministrat e atëhershëm të Kosovës dhe Shqipërisë, Hashim Thaçi dhe Edi Rama, të cilët atë ngjarje e quajtën “historike”.
