Largimi i Cristiano Ronaldos nga Real Madridit pritet të sjellë lëvizje të tjera të bujshme në merkaton e verës. Presidenti madrilen, Florentino Perez u ka premtuar tifozëve se do të ketë blerje të mëdha të cilat do ta forcojnë më shumë skuadrën. Mediat spanjolle aludojnë se do të ketë një blerje e cila do të vendosë një rekord të ri në merkaton e transferimeve dhe ajo do të vijë nga PSG.
Mbappe apo Neymar? Ja si qëndron situata e të dy yjeve në kampin parisien. Mbappe pasi zhvilloi një kampionat Botërorë fantastik dhe u shpërblye me titullin si lojtari më i mirë i ri i turneut ka fituar shumë terren tek PSG. Ai ka premtuar besnikëri dhe klubi padyshim që do të bëjë çmos për ta blinduar talentin francez. Për ta ai tashmë është i pashitshëm.
Ndërsa nga ana tjetër Neymar nuk është më i pazëvendësueshëm tek kampionët e Francës. Mediat franceze aludojnë se duke pasur parasysh atë që ndodhi në Botëror dhe ofertën e lartë që mund të vijë nga “Los Blancos”, parisienët mund ti hapin rrugë largimit.
Edhe trajneri Thomas Tuchel nuk e konsideron Neymar aq thelbësor sa Mbappe pas Kupës së Botës dhe do të ishte i gatshëm t’i hapte derën brazilianit. Gjatë ditës së sotme Neymar do të jetë në Brazil, ku do të marrë pjesë në një eveniment bamirësie në një hotel në San Paoli.
