Kryeministrja Theresa May do të takohet me kancelaren gjermane Angela Merkel gjatë ditës së sotme, për të diskutuar shqetësimet e shprehura nga ligjbërësit britanikë, lidhur me marrëveshjen e saj të Brexit.
May ka nisur një tur takimesh me udhëheqës të tjerë të BE-së, në përpjekje të sigurojë garanci për të lehtësuar shqetësimet në parlament, lidhur me marrëveshjen e saj për t’u larguar nga Bashkimi Europian.
Kryeministrja britanike anuloi gjatë ditës së djeshme votimin në parlament për marrëveshjen e daljes së Britanisë nga BE-ja, të cilën e kishte dakordësuar më herët me delegacionin e Brukselit.
Ky vendim i May erdhi pasi ajo kuptoi se nuk kishte votat e duhura për të miratuar këtë projekt-marrëveshje, ndaj u detyrua të tërhiqet për të rinegociuar edhe njëherë me krerët europianë.
Gjithsesi, vlen të theksohet se deklaratat e para zyrtare të Brukselit janë shumë pesimiste, pasi zyrtarët europianë theksuan se nuk do të pranojnë rinegocim të marrëveshjes së arritur më herët.
