Shqipëria u mposht nga Kosova në miqësoren e Zyrihut me rezultatin e thellë 3-0, por më shumë rëndoi fakti që kuqezinjtë patën një performancë të shëmtuar në fushë. Prandaj pavarësisht se ky takim ishte i vlerësuar si “vëllazërore”, loja e paraqitur dhe rezultati ngritën “alarmin” për kombëtaren shqiptare.
Ndërsa në konferencën për shtyp ditën e sotme në prag të miqësores me Ukrainën u shfaq Mërgim Mavraj, i cili u shpreh se për Kosovën ajo ishte një ndeshje që pritej prej kohësh, ndërsa për kuqezinjtë u pa si një ndeshje për të provuar lojtarët e rinj. Në fund mbrojtësi i Kombëtares ka bërë edhe një krahasim të pakuptueshëm, duke thënë se tashmë është më e lehtë për të qenë pjesë e Kombëtares, ndërsa në kohën e tij ishte një sakrificë e madhe. Megjithatë, ajo që harrohet në këtë mes është fakti që Mavraj i ka thënë “Jo” Shqipërisë për 5 vite me radhë.
“Është e vështirë të përcaktojmë diçka që ka ndodhur, pasi kemi dalë jashtë vetes dhe bëmë një paraqitje të dobët. Ajo lojë i është përshtatur lojës së Kosovës dhe situata përpara ndeshjes ishte më ndryshe.
Kosova e shihte si ndeshjen e vitit, ndërsa ne e morëm si një mundësi për të provuar të rinjtë, që të lidhen më mirë me pjesën tjetër të ekipi. Përgjegjësinë për këtë humbje duhet ta marrin lojtarët, që kanë nderin të veshin fanellën kuqezi.
Kjo është një situatë delikate për karrierën time personale. Nuk ka problem që nuk kam luajtur gjatë 2 apo 3 muajve të fundit te Hamburgu, pasi me Kombëtaren jam gjithmonë gati. E respektoj vendimin e trajnerit që të mos luaja ndaj Kosovës, ndërsa për Ukrainën nëse ai më beson në fushën e lojës, atëherë unë do të jem gati.
Unë kam bindje se Zoti është për durimtarët dhe pas vështirësive do të vijë lehtësimi. Tashmë ne duhet të shohim përpara dhe nuk është se jemi të zymtë për të ardhmen, pasi i dimë cilësitë dhe armët tona.
Nuk ka qenë asnjëherë kaq e lehtë që të bëhesh pjesë e kombëtares shqiptare sa në këtë kohë. Unë kur mendoj kohën e kaluar kur isha i ri, ishte një sakrificë e madhe për të menduar Kombëtaren, jo më për të menduar të isha pjesë e formacionit, që tashmë Panuçi u jep shumë hapësirë të rinjve.
Ne si lojtarë me eksperiencë duhet të ndihmojmë të rinjtë, por edhe këta të fundit duhet të kapin mundësinë që i ka ardhur, pasi kjo është “dhuratë” nga trajneri. Gabimi është se nuk kemi 30 lojtarë që luajnë në nivele europiane, por kemi vetëm një bazë lojtarësh që dërgojnë ekipin përpara”, ka thënë Mavraj.
