Liria është bërë faktori më i rëndësishëm brenda shoqërisë moderne, dhe miliona njerëz punojnë çdo ditë për të theksuar rëndësinë e lirisë dhe vuajtjeve që ka shkaktuar mungesa e saj në të shkuarën.
Organizata e Kombeve të Bashkuara u krijua në vitin 1945, për të siguruar ruajtjen e paqes në të gjithë botën, por më e rëndësishmja që të gjitha qeniet njerëzore të jenë të lira. OKB ka punuar që në fillim për të shfuqizuar skllavërinë në vendet e botës së tretë, që e praktikojnë ende atë edhe në shekullin XXI.
Mauritania, e pozicionuar në Afrikën Perëndimore, njihet si vendi i fundit që e shfuqizoi skllavërinë në vitin 1981. Por edhe 40 vjet më vonë, ky akt nuk njihet dhe respektohet, pasi de fakto Mauritania i lejon ende njerëzit që të zotërojnë skllevër pa i ndalur askush.
Por çarë e shkaktoi këtë problem? Fotoreporteri Seif Kusmate e vizitoi Mauritaninë për të verifikuar nëse këto zëra ishin të vërteta. Dhe ajo që e tronditi më shumë, nuk ishte fakti që skllavëria ekziston ende aty në shekullin XXI, por fakti që ata që gjendeshin nën skllavëri ishin pajtuar në një farë forme më atë gjendje.
Të njëjtin mendim ndante edhe çdo banor i Mauritanisë. Disa nga qytetarët që ai intervistoi, përfshinin ish-skllevër apo skllevër aktualë,të cilët deklaruan se skllavëria ishte diçka e ngulitur në kulturën e tyre pasi ishte praktikuar ndër dekada.
Skllavëria u bë dominuese në Mauritani gjatë kolonizimit francez në vitin1830. Por edhe pse skllavëria nuk u shfuqizua zyrtarisht në vend deri më 1981, francezët i ofruan Mauritanisë pavarësinë në vitin 1960. Për shumë vite njerëzit u mësuan të mbaheshin nën skllavëri, në shumicën e rasteve për shkak të varfërisë.
Çdo herë që qeveria e Mauritanisë pyetet në lidhje me këtë çështje, e mohon ekzistencën e skllavërisë në vend. Por ndërkohë grupet e të drejtave të njeriut në vend, vlerësojnë se gati 20 për qind e mauritanianëve jetojnë si skllevër. Me një popullsi prej 4 milion banorësh, kjo do të thotë se 800.000 prej tyre janë skllevër.
Vendi është mësuar kaq shumë me skllavërinë, saqë nuk mund ta shfuqizojë dot atë. Në një intervistë me disa skllevër, Kusmate mësoi se ata preferonin më mirë që të ishin skllevër sesa të lirë, pasi të paktën me këtë status e kishin të garantuar ushqimin dhe strehimin.
Vetëm një pakicë e vogël e popullsisë, është e detyruar të jetojë në skllavëri, ndërsa shumica e këtij 20 përqindëshit e bën pasi nuk ka asnjë mjet tjetër për të mbijetuar. Skllavëria është bërë diçka aq normale për ta, saqë po e trashëgojnë si status edhe në familje. Statusi aktual i skllavit trashëgohet nga nëna tek fëmija. Kjo do të thotë që problemi është edhe më i madh nga sa mendon bota jashtë.
Ndërkohë që brezat e rinj po indoktrinohen me skllavërinë si një pjesë e kulturës së tyre, dhe jo si diçka e padrejtë. Korrupsioni është një tjetër problem i madh që e ka nxitur vazhdimin e kësaj praktike, pasi autoritetet e mbështesin në heshtje skllavërinë, dhe madje kanë arrestuar ata qëjanë shprehur kundër saj.
Vlen të theksohet se njerëzit nën skllavëri jo vetëm që detyrohen të punojnë shumë, por gjithashtu përballen me abuzime seksuale. Gjëra të tilla janë konfirmuar nga ish-skllevërit të cilët janë intervistuar nga fotoreporteri.
Shumë prej tyre janë çliruar me ndihmën e organizatave joqeveritare që janë kundër skllavërisë, ndërsa të tjerët me ndihmën e OKB. Është i trishtë fakti që disa prej tyre u kthyen në skllevër pasi thjesht nuk kishin asgjë për të ngrënë.
Një nga rastet është ajo e Fatimatu dhe vajzës së saj Mbarka, që të dyja ish-skllave. Fatimatu thotë se ka humbur 2 foshnje, pasi ishte detyruar të shkonte në punë menjëherë pas lindjes, duke mos u lejuar asnjëherë që të kujdesej për fëmijët e saj.
Ajo u çlirua në vitin 1990 nga organizata “SOS Slaves”. Ajo thotë se situata e skllavërisë po përkeqësohet, kryesisht për shkak të varfërisë. Ajo kujton në intervistën e saj se kishte lindur në një familje skllevërish dhe statusi i ishte dhënë nga nëna e saj.
Fotoreporteri arriti të bënte foto të njerëzve të robëruar dhe kushteve të tyre të jetesës, përpara se të arrestohej nga policia lokale. Ky akt tregon nivelin e korrupsionit që vazhdon në këtë vend. Qeveria e dinte se rrezikonte kritika nga vendet e tjera nëse nuk e lironte fotoreporterin.
Burimi i lajmit: https://historyofyesterday.com/the-only-place-in-the-world-where-slavery-still-exists-78f2fed88ab
Përshtatur nga TIRANA TODAY
