Drejtoresha e Qendrës së Shërbimeve Arsimore, Rezana Vrapi ka dhënë disa informacione në lidhje me rregullat e Maturës Shtetërore 2020.
Në videon e shpërndarë nga Ministria e Arsimit, Vrapi bën me dije se ka disa rregulla të administrimit që lidhen me mënyrën se si nxënësit hyjnë në mjedisin e provimit, mënyrën se si ulen dhe mënyrën se si monitorohen.
Ajo ka paralajmëruar nxënësit se nëse do të kapen me celular gjatë provimit, ata do të penalizohen për 1 vit rresht.
“Rregullat më të forta kanë të bëjnë veçanërisht me besueshmërinë e të gjithë procesit. Pra, mos-marrjen e celularëve dhe mos-komunikimin në procesin e mjedisit. Këto janë të sanksionuara në rregulloren e Maturës Shtetërore. Prandaj bëj me dije: çdo maturant, ditën e provimit të mos ketë celular me vete, të mos komunikojë në mjedis. Në të kundërt, do të penalizohet dhe për 1 vit rresht, ai nuk do të ketë më të drejtë që ta japi këtë provim”, thotë ajo.
