Drejtoresha e Qendrës së Shërbimeve Arsimore, Rezana Vrapi ka informuar maturantët në lidhje me procesin e korrigjimit të testit të Maturës Shtetërore 2020.
Përmes një videoje të shpërndarë në faqen e ministres së Arsimit në Facebook, Vrapi sqaron se korrigjimi do të bëhet në mënyrë digjitale. Kjo pasi sipas saj, i gjithë testi do të jetë i organizuar në pyetje me alternativa.
Vrapi bën me dije se i gjithë procesi i provimeve dhe korrigjimeve do të përmbyllet brenda muajit qershor.
“Nxënësit, pasi të kenë përfunduar përgjigjet në test, duhet që t’i hedhin në fletë-përgjigje. Më pas, kjo fletë-përgjigje do të administrohet nga Qendra e Shërbimeve Arsimore dhe do të procesohet përmes skanerëve.
Kjo do të shkurtojë kohën e korrigjimit, besueshmëria e korrigjimit është maksimale dhe sigurisht edhe dalja e rezultateve në kohën e duhur. Sërish, bëjmë me dije që brenda datës 30 qershor i gjithë procesi është i përfunduar”, thotë ajo.
Drejtoresh e QSHA deklaron se procesi i printimit të diplomave do të nisë nga data 1 korrik dhe do jetë i ndarë në dy faza.
Në fazën e parë, do të printohen diplomat për të gjithë maturantët të cilët dëshirojnë të studiojnë jashtë vendit. Ndërsa ditët në vijim, do të mbyllet edhe procesi për pjesën tjetër të maturantëve.
“Më datë 1 korrik, maturantët të cilët do të studiojnë jashtë, do të kenë në dorë diplomën e Maturës Shtetërore”, sqaroi Vrapi.
